Med bakgrunn i litteraturpolitiske målsetjingar, er det ved forskrift altså gjort eit avgrensa unntak for bokbransjen frå konkurranselova § 10 for samarbeid ved omsetning av bøker. Etter Konkurransetilsynet si oppfatning er likevel eit slik generelt unntak frå konkurranselova lite treffsikkert. I den grad det er naudsynt med kulturpolitiske grep som sikrar mangfald, bør heller målretta tiltak, for eksempel direkte støtteordningar, forsterkast og i endå større grad bli retta inn mot forfattarar og lesarar.
Konkurransetilsynet meiner at forskrifta tillèt ei åtferd som avgrensar konkurransen og som er til skade for lesarane. Unntaksforskrifta er mellom anna til hinder for at bransjen utviklar seg i tråd med etterspørselen og behovet til kundane. Konkurransetilsynet har derfor ved fleire høve tatt til orde for at unntaket i bokbransjen frå konkurranselova bør opphevast. Med den auka digitaliseringa i samfunnet, er det no særleg viktig at også aktørane i bokbransjen står fritt til å utvikle nye produkt og vidareutvikle produkt som e-bøker og tenester innan strøyming av bøker.
Erfaringar frå Danmark og Sverige viser at ei friare prissetting på bøker kan gi lågare prisar, samtidig som mangfaldet blir halde oppe. Det er grunn til å tru at det same kan skje i Noreg dersom unntaksforskrifta blir oppheva.
Sjå mellom anna rapport frå Danmark.
Her følgjer eit oversyn over dei siste høyringsutsegna frå Konkurransetilsynet som gjeld bokmarknaden:
Høringsuttalelse – forslag til lov om omsetning av bøker 2022
Høringsuttalelse – forslag til endringer i forskrift om unntak fra konkurranseloven § 10 for omsetning av bøker 2019
Høringsuttalelse – forslag til endringer i forskrift om unntak fra konkurranseloven § 10 for omsetning av bøker 2016
Høringsuttalelse – Merverdiavgiftsfritak for elektroniske publikasjoner
Konkurransetilsynet var positiv til eit forslag om meirverdiavgiftsfritak for elektroniske tidsskrift og bøker. Tilsynet var oppteke av at rammevilkåra ikkje måtte låse forlaga til eksisterande format og forretningsmodellar. For å unngå potensiell konkurransevridande effekt i disfavør av digital innovasjon, meinte tilsynet at avgiftsfritaket for elektroniske tidsskrift og bøker måtte vere nøytralt både når det gjaldt format, plattformer og distribusjonsteknologi for publikasjonane.