Norgesgruppens oppkjøp av Vitusapotek må vurderast nærare

Konkurransetilsynet er mellom anna bekymra for Norgesgruppens posisjon som eigar, deleigar og attraktiv leigetakar for næringseigedom.

Dette er Konkurransetilsynets førebelse vurdering. Tilsynet har i dag sendt eit såkalla 25-dagars varsel til selskapa og vil i neste fase gjere ytterlegare og grundige vurderingar av dei konkurransemessige effektane av oppkjøpet.

Uroa gjeld òg reseptfrie legemiddel og handelsvarer. Desse vert selde på tvers av marknadene, og oppkjøpet kan difor føre til svekt konkurranse mellom partane på desse produkta.

– Norgesgruppen og Vitusapotek opererer på to viktige marknader for forbrukarane i Noreg, daglegvare og apotek. Konkurransetilsynet gjer no ein grundig vurdering av oppkjøpet, seier Beate Milford Berrefjord, avdelingsdirektør i avdeling for mat, handel og helse.

For å vurdere dei konkurransemessige verknadene av oppkjøpet, har Konkurransetilsynet innhenta og analysert informasjon frå begge dei to selskapa, samt frå aktørar i både daglegvaremarknaden og apotekmarknaden.

– Tilgang til attraktive lokale er viktig i mellom anna apotekmarknaden. Vår førebelse vurdering er at Norgesgruppens posisjon i marknader eller segment for utleie av næringslokale gjer dei i stand til å utnytte marknadsmakt, seier prosjektleiar Kathrine Tvedt Lavik.