Godkjenner tiltak i Karo Healthcare sitt oppkjøp av Aco Hud Nordic

Konkurransetilsynet har i dag godkjent kjøpar av merkevara Locobase. Sal av denne merkevara var eit vilkår for at Karo Healthcare kan overta Aco Hud Nordic.

Karo Healthcare føreslo salet av merkevara i Norden som eit avhjelpande tiltak for å få godkjend føretakssamanslutninga mellom Karo Healthcares og Aco Hud Nordic. Karo Healthcare har no inngått ein avtale med ein tredjepart om å kjøpe Locobase-merkevara i Norden.

– Kjøpar av merkevara oppfyller krava sett til ei uavhengig og eigna kjøpar. Det er positivt at det no kjem ein ny aktør som viser vilje til å konkurrere i marknaden for behandlande hudpleie, seier Marita Mæland Skjæveland, avdelingsdirektør i Konkurransetilsynet.

Konkurransetilsynet si sak er no avslutta, og forbodet mot gjennomføring av føretakssamanslutninga blir oppheva.