DMA skal sikre openheit og rettferd for alle brukarar og verksemder i den digitale økonomien. Store digitale aktørar, som oppfyller dei objektive kriteria for å være portvaktarar, må overhalde ei rekkje pliktar og forbod. DMA supplerer dei nasjonale konkurransereglane.
Det er Europa-Kommisjonen som avgjer kven som oppfyller kriteria for å vere portvaktarar. Felles for portvaktar er at dei tilbyr såkalla sentrale plattformtenestar, som bind saman eit stort tal brukarar på kvar si side av plattforma, til dømes verksemder og kundane deira. Sentrale plattformtenester kan mellom anna vere søkemotorar, app-butikkar og meldingstenester. Per september 2024 er Alphabet, Amazon, Apple, ByteDance, Meta, Microsoft og Booking utpeika som portvaktarar.
DMA legg opp til ein konkurranserettsleg førehandsregulering som pålegg portvaktene plikter og forbod. Portvaktarane skal til dømes:
- La tredjepartar fungere saman med portvaktaren sine eigne tenester i særlege høve,
- Gje verksemder tilgang til data dei genererer når dei brukar portvaktaren si plattform,
- La verksemder promotere sitt tilbod og inngå avtalar med sine kundar utanfor portvaktaren si plattform.
Portvaktarane skal til dømes ikkje:
- Gje eigne varer og tenester betre rangering enn tilsvarande varer og tenester som tredjepartar tilbyr på portvaktaren si plattform,
- Hindre sluttbrukar frå å fjerne førehandsinstallert programvare eller applikasjonar,
- Hindre sluttbrukar frå å inngå avtale med verksemder utanfor portvaktaren si plattform,
- Samanstille data på tvers av ulike tenester eller plattformar utan eksplisitt samtykke frå sluttbrukar.
Det er Europa-Kommisjonen som handhevar DMA, mellom anna ved å avgjere om ein portvaktar har brote reglane og ved å gje bøter.
Digital Markets Act vert mykje diskutert i alle konkurransemiljø, både myndigheiter, konkurranserettsadvokatar og akademikarar.