Vinnarar av Konkurransetilsynet sin masterpris

Det er no klart kven som er vinnarar av Konkurransetilsynet sin masterpris for 2024. Kenneth Hartmann og Hien Nguyen Thi Thu vann prisen for beste oppgåve i konkurranseøkonomi, og Savvas Julian Johnstad Gabor vann prisen for beste oppgåve i konkurranserett.

Kvar oppgåve ble premiert med 25 000 kroner.

Konkurranseøkonomi: Juryen si grunngjeving

Oppgåva som vann masterprisen innan konkurranseøkonomi er “Restrictive covenants in the Norwegian grocery market: an empirical study”, skrive av Kenneth Hartmann og Hien Nguyen Thi Thu ved Noregs Handelshøgskule (NHH).

I innstillinga skriv komiteen:

Masteroppgåva til Hien Nguyen Thi Thu og Kenneth Hartmann analyserer effekten av negative servituttar i den norske daglegvarebransjen. Oppgåva belyser eit tema som både er relevant for konkurransepolitikken og som er lite utforska i forskingslitteraturen. Gjennom eit omfattande dataarbeid har studentane kartlagt utbreiinga av negative servituttar i lokale daglegvaremarknader i Noreg. Vidare blir effekten av negative servituttar på marknadskonsentrasjon, omsetning og avstand til konkurrerande butikkar estimert. Den empiriske analysen er grundig og gjennomtenkt, og funna blir diskuterte på ein god måte. Oppgåva skil seg klart positivt ut, både når det gjeld ambisjonsnivå og gjennomføring.

Masteroppgåvene er vurdert av ein komité av førsteamanuensis Simen Aardal Ulsaker (OsloMet) og sjeføkonom Hans-Petter Håvås Hanson i Konkurransetilsynet.

– Oppgåva omhandlar eit tema som er relevant for konkurransepolitikken, og ho er godt skriven. Ho er ein velfortent vinnar, seier sjeføkonom Hans-Petter H. Hanson.

Konkurranserett: Juryen si grunngjeving

Oppgåva som vann masterprisen innan konkurranserett er “Agreements That Mitigate Climate Change and the Prohibition of Anticompetitive Agreements in Article 101 TFEU” skrive av Savvas Julian Johnstad Gabor ved Universitetet i Oslo (UiO).

Oppgåva drøfter tre problemstillingar innan føretakssamarbeid og klimasamarbeid, og korleis hensynet til berekraft kan få gjennomslag, og korleis det må balanserast mot andre omsyn.

I innstillinga står det mellom anna:

Oppgåva er velskriven og godt strukturert, og har ein kritisk, men balansert, tilnærming både til rettsutviklinga og til forskingsspørsmålet om berekraftomsynets gjennomslag.

Komiteen merkar at avhandlinga på solid, pedagogisk og balansert vis gir ei heilskapleg framstilling og analyse av eit svært aktuelt og debattert tema innanfor konkurranseretten. Oppgåva drøftar sentrale rettslege problemstillingar, samstundes som kandidaten gjer verdifulle sjølvstendige refleksjonar rundt rettspraksis.

– Vinnaren har skrive ei svært god oppgåve innanfor eit aktuelt tema, og det blir spennande å sjå korleis synspunkta i oppgåva vil kunne påverke framtidige diskusjonar om temaet, seier juridisk direktør Karin Stakkestad Laastad i Konkurransetilsynet.

Bidraga er vurderte av juridisk direktør Karin Stakkestad Laastad i Konkurransetilsynet og professor Eirik Østerud ved UiO. Professor Erling Hjelmeng ved UiO Universitetet i Oslo har også vore konsultert når det gjeld kåringa av vinnaravhandlinga.