No lyser Konkurransetilsynet ut 2,2 millionar kroner til forsking innanfor konkurranseøkonomi og konkurranserett. Søknadsfristen er 27. mars 2026.
Midlane skal fremje forsking på konkurranseøkonomiske og konkurranserettslege problemstillingar. Forskinga skal vere relevant for handheving av konkurranselova og dermed styrke kunnskapsgrunnlaget for konkurransepolitikken.
Søkarar kan vere undervisnings- og forskingsinstitusjonar, føretak og privatpersonar. Prosjekta kan vare maks to år.
Forskingsprosjekta kan omhandle alle tema som er relevante for handheving av konkurranselova. Døme på tema som er særleg viktige og relevante er:
- Konkurranse i digitale marknader
- Utfordringar knytte til konkurranse og berekraft
- Ex-post-evalueringar av vedtak frå konkurransemyndigheitene
- Kunstig intelligens og konkurranse
- Konkurranse i matmarknadene
- Konkurransereglane i tilknyting til arbeidsmarknaden
- Bruk av data for mellom anna marknadsovervaking og kartellavdekking
I vurderinga av søknadane vil vi vektleggje forskar sin kompetanse på fagområdet, gjennomføringsevne, søknaden sin relevans for utlysinga, og prosjektkostnad. Det kan søkast om både eitt- og toårige prosjekt. Tildeling og utbetaling vil skje i tråd med retningslinjer for tildeling av tilskotmiddel for konkurransefagleg forsking.