Konkurransetilsynet har plikt til å fremje likestilling og hindre diskriminering, og arbeider systematisk for å sikre eit inkluderande arbeidsmiljø og likeverdige tenester til heile befolkninga. Arbeidet med mangfald og inkludering er forankra i leiinga og i partssamarbeidet, og byggjer vidare på handlingsplanen «Mangfald, inkludering og likestilling» som vart etablert i 2024.
I 2025 har tilsynet arbeidd med å omsetje handlingsplanen til konkrete tiltak i rekruttering, personalpolitikk og arbeidsmiljøarbeid. Arbeidet blir følgt opp gjennom årlege vurderingar av tiltak, resultat og vidare behov, i tråd med aktivitets- og utgreiingsplikta etter likestillings- og diskrimineringslova.
Det vart ikkje tilsett personar i målgruppa for funksjonsnedsetjing eller fråvær frå arbeid, utdanning eller opplæring, som òg var tilfelle i 2024.
Arbeidsmiljøet blir følgt opp gjennom årlege medarbeidarsamtalar, faste møte med tillitsvalde, ulike kartleggingar, sluttsamtalar, vernerundar og partssamarbeid i arbeidsmiljøutval. I 2025 vart det gjennomført to arbeidsmiljødagar og ei helseveke, der ytringsklima og psykologisk tryggleik var sentrale tema. Helseveka dreier seg spesielt rundt tema frå Verdsdagen for psykisk helse. Mangfald i perspektiv og meiningar blir sett på som ein viktig føresetnad for å løyse tilsynet sitt samfunnsoppdrag på ein god måte.
Andre inkluderande tiltak omfattar tilbod om influensavaksine, trening i arbeidstida og fleksibel bruk av heimekontor. Gravide får tilbod om samtale med jordmor og leiar på arbeidsplassen, slik at det kan leggjast til rette for at den gravide skal kunne stå lengst mogleg i arbeid gjennom svangerskapet. Konkurransetilsynet har høg aktivitet i både bedriftsidrettslaget og velferdskomiteen, som legg opp til eit variert utval av sosiale aktivitetar.