Utlysing av forskingsmidlar

Konkurransetilsynet lyser ut 2,4 millionar kroner til forsking innanfor konkurranseøkonomi og konkurranserett. Søknadsfristen var 6. september 2024, og er nå stengt. 

Konkurransetilsynet si tildeling av midlar har som mål å fremje forsking innanfor konkurranseøkonomiske og konkurranserettslege problemstillingar for å styrke kunnskapsgrunnlaget for konkurransepolitikk. Dette vil i neste omgang bidra til å fremje konkurranse til fordel for forbrukarane.

Utlysinga er retta mot forskingsprosjekt innanfor konkurranserett og konkurranseøkonomi. Undervisnings- og forskingsinstitusjonar, føretak og privatpersonar kan søke om forskingsmidlar. Forskingsprosjekta kan ha ei varigheit på inntil to år.

Nokre døme på tema som tilsynet ser som viktige og relevante er:

• Konkurranse i digitale marknader
• Utfordringar knytte til konkurranse og berekraft
• Konkurranse i daglegvaremarknaden
• Konkurransereglane i tilknyting til arbeidsmarknaden
• Bruk av data for mellom anna marknadsovervaking og kartellavdekking
• Ex-post-evalueringar av vedtak frå konkurransemyndigheitene

Konkurransetilsynet oppfordrar også forskarar til å føreslå prosjekt basert på eigne vurderingar av relevante og viktige tema.

I vurderinga av søknadane vil Konkurransetilsynet vektlegge søkar sin kompetanse på fagområdet, gjennomføringsevne, søknaden sin relevans for utlysinga, samt prosjektkostnad. Det kan søkast om både eitt- og toårige prosjekt. Tildeling og utbetaling vil skje i tråd med retningslinjer for tildeling av tilskotmiddel for konkurransefagleg forsking.