Korleis hindre ulovleg anbodssamarbeid

Ulovleg anbodssamarbeid kan koste fellesskapet unødvendig mykje og svekke kvaliteten på offentlege varer og tenester. Som innkjøpar har du ei nø viktig rolle i å førebyggje og oppdage slikt samarbeid. Her får du råd, faresignal og verktøy for å sikre ein sunn anbodskonkurranse og gjere ein så god avtale som mogleg.

Innhald på sida:

1. Kva er ulovleg samarbeid?

2. Slik kan du førebyggje og gjennomføre trygt

3. Kva gjer du ved mistanke?

4. Nedlastbar sjekkliste og fleire ressursar

1. Kva er ulovleg anbodssamarbeid?

Ulovleg samarbeid mellom tilbydarar i anbod er ei alvorleg form for økonomisk kriminalitet. Det kan føre til høgare prisar, dårlegare kvalitet og mindre innovasjon – og kostar samfunnet store summar.

Kva er det?

Ulovleg anbodssamarbeid skjer når konkurrentar avtaler prisar, vilkår eller fordeler marknaden før dei leverer tilbod. Denne typen samarbeid kan ta mange ulike former. Dette kan for eksempel gjerast ved:

Anbodsrotasjon: Bedrifter skiftar på å vinne anbod.
Marknadsdeling: Geografisk, produktbasert eller etter kvotar.
Fiktive tilbod: Tilbod som er prisa for høgt eller inneheld uakseptable vilkår.
Unnlating: Bedrifter som normalt ville gitt tilbod, lèt vere.

Slike avtalar er skjulte og kan vare over lang tid – ofte utan at innkjøpar ser det.

Du finn meir informasjon om skilnaden på lovleg og ulovleg samarbeid på Konkurransetilsynet sin side om prosjektsamarbeid.

Kvifor er det alvorleg?

Kvart år kjøper staten og kommunane i Noreg varer, tenester og investerer for nærare 835 milliardar kroner (dfo.no). Dersom bedrifter samarbeider ulovleg om anbod, kan dei fråta fellesskapet for store summar

Økonomiske konsekvensar:

Prisane kan auke med 10–50 % ved ulovleg samarbeid (OECD)
Fellesskapet taper pengar, og kvaliteten på tenester kan bli dårlegare

Samfunnsmessige konsekvensar:

Mindre innovasjon og færre nye aktørar
Svekka tillit til offentlege innkjøp
Risiko for korrupsjon og uheldige bindingar

Kven er mest utsett?

Bransjar med høg risiko:

Få aktørar og høge etableringskostnader -Dess færre bedrifter som er aktuelle til anbodet, desto lettare er det for aktørane i marknaden til å bli samde om korleis dei skal rigge tilboda.
Symmetri mellom tilbydarar – når bedrifter er ganske like, til dømes i kostnader, kapasitet og marknadsandel, kan det vere lettare for dei å samarbeide om å manipulere tilbod.
Lite innovasjon og få alternative produkt – lite innovasjon med omsyn til dei etterspurde produkta eller tenestene gjer det også enklare å halde oppe eit samarbeid over tid.
Uformelle nettverk og bransjeforeiningar som møteplass.

Anbodsprosessar som gir risiko:

Føreseielege og repeterande anbod – Når etterspurnaden frå det offentlege er stabil og føreseieleg, aukar risikoen for ulovleg samarbeid. Store endringar i etterspurnad kan bryte opp slike avtalar.
Sterkt fokus på pris og standardiserte krav – Når innkjøparar legg mest vekt på pris og vel standardiserte tilbod, blir det lettare for bedrifter å samarbeide ulovleg. Pris er eit enkelt punkt å bli einige om.
Rammeavtaler – dei kan låse innkjøp til visse leverandørar og gjere samarbeid lettare

Innkjøparens rolle

Som innkjøpar har du eit unikt høve til å oppdage og førebyggje ulovleg samarbeid:

Du kjenner marknaden og tilbydarane
Du ser mønster i tilbod og prisar
Du kan stille krav som fremjar konkurranse
Du kan varsle viss du ser noko mistenkeleg

2. Slik kan du førebyggje og gjennomføre trygt

Som innkjøpar har du ei nøkkelrolle i å minske risikoen for ulovleg samarbeid. God planlegging og gjennomføring av anbod kan redusere risikoen vesentleg. Under finn du sjekklister for kvar fase i eit anbod.

Før anbodet

Gjer deg kjend med marknaden:

Kartlegg produkt, prisar og tilbydarar – også frå andre område eller land
Sjekk tidlegare anbod og prisutvikling
Snakk med andre innkjøparar som har kjøpt liknande varer eller tenester

Vurder risiko:

Har det vore ulovleg samarbeid i denne bransjen før?
Er det få aktørar, lite innovasjon eller høge etableringskostnader?
Er det sosiale nettverk eller bransjeforeiningar som kan vere arena for samarbeid?

Utform anbodet klokt:

Bruk enkle og relevante krav – ikkje krev høg omsetning eller lang erfaring utan god grunn
Opne for alternative løysingar og tilbydarar frå andre område
Unngå krav som favoriserer tidlegare leverandørar eller statlege aktørar
Tilby gode betalingsvilkår for å inkludere mindre bedrifter
I kronikken “Skal, skal ikke dele opp?” finn du fleire eksempler på måter å utforme anbodet på, til dømes å dele opp anbodet.

Bruk konsulentar med omhu:

Sjekk at dei ikkje har bindingar til leverandørar
Be dei signere på konfidensialitet og interessekonflikt

Gi informasjon

Informer tilbydarar om sanksjonar ved ulovleg samarbeid, som bøter, utestenging, straff og krav om erstatning – og gi informasjon om ordningar for dei som varslar eller samarbeider med myndigheitene. Du kan lese meir om amnestiordinga til Konkurransetilsynet på informasjonsida om amnesti.

Under anbodet

Begrens kontakt mellom tilbydarar:

Unngå felles synfaringar eller møteplassar
Bruk digitale løysingar for innlevering og kommunikasjon

Del informasjon likt og anonymt:

Svar på spørsmål frå tilbydarar raskt og offentleg
Ikkje del namn eller tal på tilbydarar under prosessen

Be om relevant informasjon:

Be tilbydarar opplyse om eigarskap, samarbeidspartnarar og underleverandørar
Be om erklæring om at tilbodet er utarbeidd sjølvstendig

Unngå utilsikta samarbeid:

Vurder nøye kva informasjon du gir ved opning og publisering av resultat

Etter anbodet

Analyser tilbod og prisar:

Er prisane uvanleg like eller høge?
Er det mønster i kven som vinn?
Har fleire tilbod same format eller språk?

Bruk gode tildelingskriterium:

Kombiner pris med kvalitet, leveringstid, garanti og innovasjon
Legg til kriterium som kan avgjere ved likt tilbod
Vurder å lyse ut anbodet på nytt viss konkurransen er svak

Unngå å låse framtidige innkjøp:

Vurder rammeavtalar nøye – dei kan gjere samarbeid lettare
Unngå å opplyse nøyaktig når og kor mykje som skal kjøpast

Sjekkliste

Har du vurdert om kravspesifikasjonane er klare og relevante?
Har du opna for alternative løysingar og tilbydarar frå andre område?

Last ned fullstendig sjekkliste for offentlege innkjøparar i PDF-format.

3. Faresignal og mistanke om ulovleg anbodssamarbeid

Har du mistanke om ulovleg samarbeid i ein anbodskonkurranse? Ta kontakt med Konkurransetilsynet – anonymt om du ønskjer. Vi behandlar alle tips konfidensielt. På tipssida vår finn du både telefonnummer og anonyme tipsskjema.