Konkurransetilsynet > Publikasjoner > Årsrapportar > Årsmelding 2024 > Styring og kontroll i verksemda

Styring og kontroll i verksemda

Overordna vurdering av styring og kontroll i verksemda

Verksemdstyring

Strategiplan for 2022-2027 styrer korleis Konkurransetilsynet jobbar: kva vi prioriterer og kva retningar vi vel i denne perioden. Strategiplanen heng saman med andre viktige dokument, som verksemdsplan, månadsrapportar og årsrapport, i tillegg til føringane i tildelingsbrevet. Dette gir oss ein klar plan for kva vi skal fokusere på og korleis vi rapporterer resultata våre.  

Når vi tek avgjerder om verksemdstyring, vurderer kva resultat vi ønskjer å oppnå. Dette inneber at vi kontinuerleg vurderer korleis vi brukar ressursane våre for å skape størst mogleg verdi for samfunnet. Vi justerer metodar og prioriteringar etter desse vurderingane.

Les meir om ressurbruk og resultatkjede her: Resultatkjede og ressursbruk

Etatsstyringsdialog

Konkurransetilsynet har ein løpande og konstruktiv dialog med avdelinga for konkurransepolitikk, selskapsrett og næringsøkonomi i Nærings- og fiskeridepartementet (NFD). Dialogen om effektane av arbeidet vårt står sentralt.  

I 2024 var fokusområda daglegvare, digitalisering, samt konkurranse og berekraft. Vi rapporterer om oppnådde mål i samsvar med krava i tildelingsbrevet og departementets bestillingar. Det vart gjennomført to etatsstyringsmøte i 2024.  

Internkontroll og etterleving

Strategi- og verksemdsplanen vår omfattar heile verksemda, og god internkontroll er ein føresetnad for å nå måle våre og sikre god styring. Vi vurderer at internkontrollen vår fungerer godt.  

Eit system for sikkerheit og avvikshandtering bidreg til effektiv risikovurdering og førebyggjande tiltak. Regelmessig og formålstenleg intern rapportering om økonomi og ressursbruk, samt systematisering av prioriteringar og evalueringar, har saman med vidareutvikling av styringskompetanse styrkt internkontrollen vår.  

Internkontrollsystemet er dokumentert gjennom retningslinjer og kontrollprosessar, som dekker både saksbehandling og administrative prosessar. Vi arbeider kontinuerleg med å styrkje kompetanse og kultur innan informasjonstryggleik, etterleving av forvaltningslova, offentleglova og personvernreglar. Resultata frå klagesaker i Konkurranseklagenemnda bruker vi til å vurdere om det er behov for tilpassingar.  

Bemanning og organisasjon

I 2024 har vi hatt eit stort fokus på tema innan arbeidsmiljø, som til dømes ytringsklima, kommunikasjon og samarbeid. I 2025 skal vi halde fram med dette arbeidet på ein systematisk og brei måte. I 2024 arbeidde vi vidare med leiarutvikling. Ei stor gruppe med ulike leiarroller deltok i parallelle leiarutviklingsprogram som starta i 2022 og vart avslutta i desember 2024. Vi vil ta med oss lærdom og verktøy frå programma i det daglege arbeidet.

Vi har òg utvikla oss gjennom læring på arbeidsplassen, vidareutdanning og kurs. Vi har delteke på konferansar, kurs og internasjonale møte, både digitalt og fysisk. Auka digitalisering har gjort det enklare å dele kunnskap og styrkje kompetansen vår.

Nøkkeltal 2024 (2023)

Median ansienniet 6 år (8 år)
Gjennomsnittleg ansiennitet – 8,2 år (7,8 år)
Turnover – 13,13% (8,9%)
Sjukefråvær – 3,5% (3,5 %)

Rekruttere og behalde

I 2024 auka turnover frå 8,9 prosent frå 13,13 prosent. Det er utfordrande å rekruttere spesialkompetanse innanfor våre lønnsrammer, spesielt innan digitalisering og for erfarne fagfolk. For å handtere desse utfordringane i ein konkurranseutsett arbeidsmarknad vil vi halde fram det strategiske arbeidet med å behalde, utvikle og tiltrekkje oss den kompetansen vi treng for å utføre samfunnsoppdraget vårt. Eit eksempel på dette er deltaking på karrieredagar, besøk av studentar og elevar, samt tilbod om traineeopphald. 

I 2024 tilsette Konkurransetilsynet 11 nye medarbeidarar med kompetanse innan samfunnsøkonomi, juss, IT, kommunikasjon og informasjonsforvaltning.  

Inkludering, mangfald og likestilling Her kan lese meir om Konkurransetilsynet sitt arbeid for inkludering, mangfald og likestilling i 2024.

Bruk av konsulentar og kommunikasjonstenester

Konkurransetilsynet har ikkje nytta kommunikasjonstenester i 2024. Det var brukt 242 900 kroner på leiarutvikling. I tillegg kjøpte tilsynet andre konsulenttenester for 1,082 mill. kroner. Desse tenestene omfatta hovudsakleg marginstudiar bestilte frå NFD, bistand ved rekruttering og innleige av vikar ved fråvær.

Totalt sett svarar bruken av konsulenttenester til omtrent 1,3 årsverk i 2024.

Konsulenttenester 2022 2023 2024
Konsulenttenester 1 377 000 2 743 791 1 082 487
Konsulenttenester kommunikasjonsrådgjeving 156 792 0 0
Konsulenttenester organisasjonsutvikling 30 000 1 023 659 242 900

Tryggleik og beredskap

Konkurransetilsynet skal innanfor sitt samfunnsoppdrag hjelpe næringslivet til å levere varer og tenester samfunnet etterspør – også under kriser. I 2024 haldt vi fram med systematisk arbeid med tryggleik og beredskap for å førebyggje, avdekke og handtere hendingar som kan hindre oss i å nå måla våre. Vi sikrar og dokumenterer tryggleiken etter Nasjonal strategi for digital sikkerheit med tilhøyrande tiltaksplan. Vi balanserer naudsynte tryggingstiltak og akseptabel risiko, utan at det går utover effektiviteten eller måloppnåing.

For å styrkje motstandsevna vår har vi satt i verk formålstenlege tiltak og gjennomgått beredskapsplanane. Grunna den alvorlege sikkerheitspolitiske situasjonen i Europa har vi i 2024 ytterlegare forsterka tryggleiken. Planen for krise- og beredskap blir følgt opp og justert løypande. Planverket er oppdatert i tråd med anbefalingane i den nasjonale strategi for digital sikkerheit.

Tryggingsarbeidet i Konkurransetilsynet er risikobasert. I 2024 gjennomførte vi tre sikkerheitsøvingar for å kontrollere og vidareutvikle planane våre. Avvikssystem og tryggingsøvingar bidreg til at vi oppdagar sårbarheiter og kan setje i verk førebyggjande tiltak mot uønskte hendingar.

Miljø, berekraft og grøn omstilling

På området for offentlege anskaffingar er Konkurransetilsynet ein relativt liten aktør. Vi deltek i alle avtalar inngått av Statens innkjøpssenter, der det blir lagt vekt på å redusere miljøpåverknaden. Desse avtalene er mellom anna knytt til reisebyrå, forbruksmateriell og ombruk og gjenvinning av IKT-utstyr. Over 90 prosent av innkjøpa våre er miljømerka produkt.

I konkurransar vi gjennomfører sjølve, inkluderer vi miljø- og berekraftskrav der det er relevant for konkurransen.

Tilsynet nyttar reisebyråportalen Egencia for å bestille flyreiser gjennom Statens innkjøpssenter sine avtalar. Avtaleprisene kjem opp som øvste treff i portalen, og ein stor del av tilsynet sine reiser går på desse prisane. I 2024 har talet på innanlandsreiser auka noko, medan talet på utanlandsreiser har blitt redusert. Dette har bidrege til redusert klimapåverknad.

Konkurransetilsynet held til i BREEAM-sertifiserte lokale, der det er lagt opp til omfattande kjeldesortering. Utleigaren sin leverandør av kantinetenester jobbar òg med å redusere matsvinnet, mellom anna gjennom rapportering av kor mykje mat som blir kasta kvar dag. Utleigar har installert solcellepanel for å redusere straumforbruket. Anlegget vart montert i 2023 og har vore i prøvedrift fram til 2024. I 2024 var tilsynet sin del av den samla produksjonen 16 050 kWt.

I tillegg er arbeidet med å skifta alle lysarmaturar frå lysstoffrøyr til LED starta. Dette vil ytterlegare redusere energiforbruket.

Tilsynet sitt klimagassutslepp har blitt redusert fra 117,63 til 97,73 tonn CO2 i 2024.

Gå vidare til kapittel om vurdering av framtidsutsikter →