Aktivitetar og resultat

Samla vurdering av oppnådde resultat

Konkurransetilsynet skal bidra til effektiv bruk av samfunnsressursane ved å fremje konkurranse til fordel for forbrukarar og næringsliv. I tildelingsbrevet for 2024 frå Nærings- og fiskeridepartementet er det sett opp konkrete mål og indikatorar for måloppnåing. Det er også ei klar forventning om at tilsynet innrettar verksemda si slik at måla blir oppnådde på ein effektiv måte.

I det følgjande gjer vi greie for vurderinga av oppnådde resultat i forhold til desse styringsindikatorane. Vi gir òg ei kort oversikt over viktige tiltak som er gjennomførte for å sikra effektiviteten i verksemda. Når det gjeld prioriterte tiltak og bestillingar for 2024, viser vi til eigen omtale av desse i årsrapporten.

Eit hovudmål for Konkurransetilsynet er velfungerande marknader der marknadsaktørane etterlever konkurransereglane. For å nå dette målet er eit viktig delmål aktiv handheving av konkurranselova med forskrifter og konkurransereglane i EØS-avtalen.

I 2024 hadde Konkurransetilsynet høgt aktivitetsnivå, med fleire pågåande etterforskingssaker mellom anna av trafikkskular og marknaden for flyttetenester. Vi avslutta og prisjegersaka, der det vart vedteke å gi eit stort gebyr til dei tre store daglegvareaktørane. Vi har også avslutta ei sak relatert til apotekmarknaden då det ikkje var grunnlag for å halde fram etterforskinga.

Vidare har vi lagt stor vekt på god dialog med offentlege innkjøparar og næringslivet for å formidle kunnskap om sentrale aspekt ved konkurranselova. For at personstraff skal ha avskrekkande effekt, blir det vurdert om dette er aktuelt i alle saker der det har skjedd alvorlege regelbrot.

For å bidra til at saksbehandlinga til tilsynet er profesjonell og serviceinnstilt, blir det gjennomført ei intern evaluering av arbeidet vårt i alle større saker. Ekstern tilbakemelding er og viktig for oss. Også i 2024 har vi hatt god dialog med representantane til partane i konkrete saker, og vi har vidareført den generelle tilbakemeldingsdialogen med Advokatforeininga og jamleg kontakt med bransjeforeiningar. gersaka, der det vart vedteke å gi eit stort gebyr til dei tre store daglegvareaktørane. Vi har også avslutta ei sak relatert til apotekmarknaden då det ikkje var grunnlag for å halde fram etterforskinga.

I 2024 fekk Konkurransetilsynet 151 meldingar om føretakssamanslutningar, der 147 vart avslutta innan 25 verkedagar. Samanlikna med 2023, så vi ein auke i fusjonsmeldingar på 33 prosent. Ein effektiv fusjonskontroll sparar ressursar for næringslivet og bidreg til velfungerande konkurranse. Vi forbaud føretakssamanslutninga mellom Norva24 Vest og Vitek Miljø, medan fusjonen mellom TGS og PGS vart godkjend.

Vidare påla tilsynet opplysningsplikt på føretak i særleg konsentrerte marknader og følgde opp saker der opplysningsplikt allereie var pålagd. Ein viktig del av tilsynet sitt ansvar knytt til fusjonskontrollen har også vore aktiv marknadsovervaking.

I 2024 gjennomførte tilsynet ei organisatorisk endring for å styrkje etterforskingsarbeidet. Etterforskingskompetansen vart integrert i del av arbeidet i marknadsavdelingane for å sikre eit meir heilskapleg ansvar for etterforskingsarbeidet. Å realisere målsetjingane bak denne endringa vil vere ein viktig del av tilsynet sitt arbeid i 2025, ikkje minst gjennom å byggja opp og integrere etterforskingskompetanse på tvers av organisasjonen. Det vil ta tid før vi kan måle dei fulle effektane av endringa.

Mot slutten av 2023 vart det vedteke å etablere ei ny eining for data og analyse i Konkurransetilsynet. Eininga fungerer som ei serviceeining for heile tilsynet og er ei drivkraft i utviklinga av nye digitale løysingar, til dømes basert på bruk av kunstig intelligens i handhevingsarbeidet. Eininga bidreg også til å byggje opp kompetanse innan innsamling og analyse av store datamengder, styrkje digital kompetanse i avdelingane og ta ansvar for større prosjekt som krev særskilt digital kompetanse. Ei viktig oppgåve i 2024 har vore å utvikla kapasiteten og kompetansen i eininga, slik at måla bak etableringa av eininga kan innfriast. Dette arbeidet vil halde fram i 2025.

Aktiv handheving av konkurranselova i tråd med målsetjingane føreset god og høg kompetanse i alle delar av organisasjonen. Også i 2024 gjennomførte tilsynet fleire tiltak for å sikre dette, mellom anna gjennom vidare arbeid med leiarutvikling på fleire nivå i organisasjonen. For tilsynet vil det framover vere viktig å utnytte denne kunnskapen. Tilsynet har også arbeidd med å etablere system som kan gi god styringsinformasjon på ulike leiingsnivå.

I tillegg til høg kompetanse og motiverte medarbeidarar er det også viktig at organisasjonen har ein god organisasjonskultur, der medarbeidarane opplever at dei jobbar i eit utviklande miljø og at det er trygt å seie frå. Ein organisasjon utan ein trygg tilbakemeldingskultur kan lett stagnere. For tilsynet vil arbeidet med å byggje ein god og trygg kultur vere ei sentral oppgåve i 2025.

I 2024 har Konkurransetilsynet vore ein aktiv deltakar i alle formelle og uformelle forum som EØS-avtalen gir høve til. Dette inkluderer deltaking i ei rekkje arbeidsgrupper og sektorvise undergrupper i det europeiske konkurransenettverket (ECN). Tilsynet har også delteke på to plenarmøter og to generaldirektørmøte.

Vi har løypande halde Nærings- og fiskeridepartementet (NFD) oppdatert om regelverksutviklinga på konkurranseområdet i EU. I fleire konkrete regelverkssaker har vi bidrege med kompetanse i arbeidet med utforming av norske posisjon i pågåande og kommande regelverksarbeid.

Konkurransetilsynet har òg hatt tett dialog med Eftas overvakingsorgan (ESA) i konkrete saker og samarbeidd med dei andre Efta-landa, mellom anna gjennom deltaking i Efta Competition Network.

Konkurransetilsynet sitt engasjement i det nordiske samarbeidet er særleg viktig. I tillegg til tett kontakt på leiarnivå møtest dei nordiske konkurransestyresmaktene årleg for å diskutere aktuelle tema. Vidare samarbeider dei aktivt i fleire ulike nettverksgrupper. To av dei nyaste gruppene utvekslar erfaringar om teknisk etterforsking og analyse av data frå offentlege innkjøp.

I 2024 publiserte dei nordiske konkurransestyresmakter ein nordisk rapport med tittelen “Competition and Labour Markets”.

Vi har og hatt tett og god dialog med NFD knytt til arbeidet vårt som representant for Noreg i OECDs Konkurransekomité. I 2025 vil vi bidra til å styrkje og formalisere dialogen med NFD ytterlegare.

Generelt er deltakinga i det internasjonale konkurransenettverket (ICN) ein viktig arena for å hente og dele kunnskap og erfaringar. Det internasjonale arbeidet gir eit solid fundament for effektiv utføring av oppgåvene våre med å handheve konkurranselova i Noreg, og sikrar at vi oppfyller samfunnet sine forventningar til tilsynet sitt arbeid.

For å fremje konkurranse og forhindre konkurranseskadeleg åtferd, har tilsynet gjennom 2024 halde fram med eit aktivt informasjonsarbeid om konkurranselova og betydninga av eit konkurransefremjande regelverk. Dette arbeidet er gjennomført på fleire måtar og gjennom ulike kanalar.

Tilsynet har mellom anna publisert høyringsfråsegn, kronikkar, rapportar og fagartiklar. Tilsette har også halde ei rekkje foredrag og faglege innlegg i samband med deltaking på relevante konferansar, både nasjonalt og internasjonalt. I tillegg arrangerte Konkurransetilsynet den årlege juskonferansen, samt ein daglegvarekonferanse i 2024.

For å formidle informasjon effektivt til ulike målgrupper bruker tilsynet sosiale medium aktivt og har vidareført arbeidet med å produsere podkast og webinar om aktuelle tema.

I 2024 vart det gjennomført ein brei tipskampanje på fleire plattformer og gjennom informasjonsmøte med næringslivet i dei største byane. Målet var å få inn fleire tips og auke kunnskapen om konkurranselova. For å nå ut til små og mellomstore føretak har vi særleg arbeidd for å styrkje samarbeidet med interesseorganisasjonane til næringslivet og lokale næringslivsforeiningar.

Aktivt informasjonsarbeid resulterte i om lag 4 600 medieoppslag i 2024. Å nå ut med informasjon til dei som endå ikkje har gått ut i arbeidslivet er òg viktig. I løpet av 2024 kom 13 skuleklassar på besøk til Konkurransetilsynet for å lære meir om konkurransepolitikk.

Resultat i handhevinga

Eit kartell er eit ulovleg samarbeid mellom to eller fleire føretak som skulle ha konkurrert, men som i staden samarbeider om til dømes prisar, delar marknader mellom seg, utvekslar informasjon dei ikkje skal, eller avgrensar kor mykje dei sel eller produserer. Slike samarbeid skadar konkurransen og kan føre til høgare prisar for forbrukarane. Å avdekke kartell og handheve reglane mot ulovleg samarbeid er eitt av Konkurransetilsynet sine hovudoppdrag.

Vi overvaker alle typar marknader og kan starte undersøkingar på grunnlag av eigne funn, klager frå andre, tips, eller søknader om lemping (amnesti) frå føretak som rapporterer om eigne ulovlege handlingar. På nettsida vår kan ein tipse oss anonymt og sikkert. Vi har teieplikt om identiteten til tipsarar, både under og etter ei eventuell etterforsking.

Merksemda kring våre etterforskingar har ein førebyggjande effekt og kan hindre ulovleg samarbeid mellom konkurrentar.

Pågåande etterforskingar

Her finn du oversikt over alle pågåande og avslutta etterforskingar.

Hausten 2021 gjennomførte Konkurransetilsynet bevissikring hos aktørar i marknaden for flyttetenester, etter mistanke om ulovleg samarbeid. I april 2024 varsla tilsynet gebyr til to aktørar.

I november 2024 gjennomførte Konkurransetilsynet uanmeldte kontrollar hos fleire trafikkskular, basert på ein mistanke om ulovleg samarbeid. Bevissikringa vart gjennomført etter løyve frå tingretten, og relevant materiale blei beslaglagt for vidare gjennomgang.

Avslutta etterforsking i apotekmarknaden

Våren 2021 gjennomførte Konkurransetilsynet uanmeldte kontrollar hos aktørar i apotekmarknaden, etter mistanke om ulovleg samarbeid. Etter grundige undersøkingar har tilsynet ikkje funne grunnlag for å halde fram etterforskinga og har avslutta saka. Likevel vil tilsynet følgje marknaden nøye sidan det er få aktørar med sterke posisjonar i fleire ledd av verdikjeda.

Vedtak mot aktørar i daglegvaremarknaden

I august 2024 sendte Konkurransetilsynet vedtak til Coop, NorgesGruppen og Rema om brot på konkurranselova § 10 og EØS-avtalen artikkel 53. Dei tre daglegvarekjedene hadde samarbeidd om å gi konkurrentane sine “prisjegerar” tilgang til å hente inn store mengder prisinformasjon i kjedenes butikkar. Denne kontinuerlege prisovervakinga auka gjennomsiktigheita mellom dei tre kjedene og svekte insentivet til å konkurrere hardt på pris. Tilsynet påla gebyr til Coop på 1,3 milliardar kroner, til NorgesGruppen på 2,3 milliardar kroner, og til Rema på 1,3 milliardar kroner. Vi påla også kjedene å avslutte det ulovlege samarbeidet og eventuelle samarbeid med tilsvarande verknad.

Ulovleg samarbeid

Konkurranselova § 10 forbyr samarbeid mellom føretak som har til formål eller verknad å hemme konkurransen. Dette gjeld ikkje berre formelle avtalar, men også uformelt samarbeid som kan skade konkurransen. Forbodet omfattar alle typar samarbeid, både mellom føretak på same nivå i verdikjeda (horisontalt) og mellom føretak på ulike trinn i verdikjeda (vertikalt). Det første føretaket som melder frå til oss om ulovleg samarbeid kan sleppe gebyr ved å søke amnesti.

Resultatkjede knytt til Konkurransetilsynet sitt arbeid med kartellavdekking/ulovleg samarbeid


INNSATSFAKTORAR

  • Ressursar frå alle marknadsavdelingane og stabar
  • Oppretthalde ressursbruk i prioriterte etterforskingssaker

AKTIVITETAR

  • Pågåande etterforsking mot aktørar i marknaden for trafikkskular.
  • Pågåande etterforsking mot aktørar i marknaden for flyttetenester.
  • Vurdering av tips om kartell og ulovleg samarbeid.
  • Deltaking i internasjonale arbeidsgrupper om avdekking av kartell, metodar for etterforsking og meir.
  • Dialog med offentlege innkjøparar og næringslivet: informasjon om lemping og tipsordning, samt synlegheit i media.

PRODUKT/TENESTER

  • Saka i apotekmarknaden er avslutta.
  • Gebyr til NorgesGruppen, Rema og Coop.

BRUKAREFFEKTAR

  • Tovegs anonym dialog gjennom tipskanal legg til rette for fleire tips om ulovleg samarbeid.
  • Verksemd retta mot offentlege innkjøparar og næringslivsaktørar for å fremje avdekking av ulovleg samarbeid mellom konkurrentar.

SAMFUNNSEFFEKTAR

  • Ulovleg samarbeid mellom føretak skadar forbrukarane, som må betale høgare prisar. Når slikt samarbeid blir stansa eller forhindra, kjem fordelane av konkurranse forbrukarane til gode i form av meir innovasjon, lågare prisar og betre utval.

Vedtak om lovbrotsgebyr for ulovleg samarbeid og misbruk av dominans 2014-2024

Pågåande etterforskingssak

I februar 2022 gjennomførte Konkurransetilsynet bevissikring hos KLP, Noregs største pensjonsselskap, for mistanke om brot på konkurranselova § 11. Mistanken gjeld KLP si verksemd i marknaden for tenestepensjon. Tilsynet har teke beslag i relevant materiale. KLP spelar ei viktig rolle for over 900 000 nordmenn i offentleg sektor som får pensjon gjennom selskapet. Forvaltningskapitalen til KLP varierer mellom 700 og 1000 milliardar kronar, avhengig av tidsperiode. Etterforskinga er framleis pågåande.

I samband med saka prøver Konkurransetilsynet for retten, kva som er rekkevidda av beslagsfridomen etter konkurranselova for dokument som er utarbeida av internadvokatar. Saka skal opp for lagmannsretten i slutten av april 2025.

Avhjelpande tiltak

Føretak som Konkurransetilsynet etterforskar for mogleg brot på §10 (ulovleg samarbeid), eller brot på §11 (misbruk av dominerande stilling), kan foreslå avhjelpande tiltak når som helst under etterforskinga. Desse tiltaka kan vere endringar i eiga åtferd eller strukturelle endringar i føretaket for å forebygge konkurranseproblema som saka avdekkjer. Å foreslå slike tiltak betyr ikkje at føretaka innrømmer skuld. Når Konkurransetilsynet setter i verk slike tiltak, er dette uavhengig av om det har skjedd brot på konkurranselova. Vedtaket forpliktar føretaka til å etterleve krava som blir sette i verk.

Misbruk av dominans

Konkurranselova § 11 forbyr føretak med dominerande marknadsstilling å misbruke posisjonen sin. Eit føretak har ei dominerande stilling dersom det kan bestemme prisar, vilkår eller andre forhold utan å ta omsyn til konkurrentar, kundar eller forbrukarane. Slike føretak har eit særleg ansvar for å unngå at deira åtferd hemmar konkurransen.

Misbruk kan omfatte handlingar som:

  • Underprising: Sal av varer eller tenester til tapande prisar for å presse konkurrentar ut av marknaden.
  • Marginskvis: Dominerande føretak kontrollerer både tilgang til varer eller tenester og sluttbrukarprisar, og set prisane slik at konkurrentar ikkje kan oppnå lønsemd.
  • Lojalitetsrabattar: Spesielle rabattar som gjer at kundar berre kjøpar frå det dominerande føretaket, noko som kan hindre konkurrentar i å få tilgang til marknaden.
  • Eksklusivavtalar: Avtalar som krev at kundar berre handlar med det dominerande føretaket og ikkje med konkurrentar, noko som kan stenge andre ut frå marknaden.
  • Leveringsnekt: Når det dominerande føretaket nektar å levere varer eller tenester som er heilt nødvendige for at konkurrentar skal kunne operere i marknaden.
  • Urimelege forretningsvilkår: Når det dominerande føretaket stiller krav til prisar eller vilkår som er urimelege og til skade for konkurrentar eller kundar.

Resultatkjede knytt til Konkurransetilsynet si handheving av forbodet mot misbruk av dominans

INNSATSFAKTORAR
• Ressursar frå alle marknadsavdelingar og stabar
• Prioritering av saker etter ressursbruk og effektar

AKTIVITETAR

• Pågåande etterforsking mot KLP i marknaden for tenestepensjon
• Vurdering av tips og klager om mogleg misbruk av dominans

PRODUKT/TENESTER
• Etterforskingssaka mot KLP følger planlagde milepælar, inkludert kontakt og dialog med selskapet samt rettslege avklaringar.

BRUKAREFFEKTAR

• Marknadsaktørar med dominerande stilling er forventa å etterleve konkurranselova og tilpasse praksis til regelverket. Det legg til rette for at andre aktørar lettare kan konkurrere med det dominerande føretaket, og at nye aktørar kan etablere seg i marknaden.
• Betre forståing blant forbrukarar for konsekvensar av misbruk av dominans

SAMFUNNSEFFEKTAR
• Forbrukarar og andre aktørar får eit reelt val mellom ulike leverandørar av varer og tenester
• Konkurranse bidrar til lågare prisar og betre utval av produkt og tenester

Konkurransetilsynet har som oppgåve å sikre at konkurransen i marknadene er effektiv og rettferdig. Dette inneber at vi vurderer korleis føretak er organiserte og samansette når vi mottar meldingar om føretakssamanslutningar. Vi legg vekt på om slike samanslutningar kan føre til ein betydeleg svekking av konkurransen i marknaden.

Konkurranselova § 16 forbyr fusjoner og oppkjøp som kan skade konkurransen. Men vi kan og godkjenne slike samanslåingar som ikkje svekkjer konkurransen, slik at forbrukarane ikkje tapar på det.

Meldeplikt for fusjonar og oppkjøp

Konkurranselova § 18 krev at føretak melder frå om fusjonar og oppkjøp til Konkurransetilsynet dersom dei samla har ei årleg omsetning på over 1 milliard kronar. Dersom berre eit av selskapa omset for meir enn 100 millionar kroner, er det ikkje nødvendig å melde. Fusjonar som overstig desse grensene, kan ikkje fullførast før Konkurransetilsynet har motteke meldinga og behandla saka.

I nokre tilfelle kan Konkurransetilsynet krevje melding sjølv om grensene ikkje er nådde. Dette skjer dersom fusjonen kan påverke konkurransen eller det finst andre grunnar til å sjå nærare på saka, til dømes fare for.

Opplysningsplikt

Konkurransetilsynet kan etter konkurranselova § 24 krevje at føretak gir opplysningar om fusjonar og oppkjøp, spesielt i marknader med svak konkurranse eller høg marknadskonsentrasjon. Dette er fordi sjølv kjøp av mindre føretak kan skade konkurransen og føre til høgare prisar og dårlegare tilbod for forbrukarane. Føretak må derfor informere om alle føretakssamanslåingar, sjølv dei som er under grensa for meldeplikt. Opplysningsplikta varer i to år.

TGS Newco og PGS

Konkurransetilsynet har vurdert føretakssamanslåinga mellom TGS Newco og PGS som begge er aktørar innanfor marknaden for geofysiske tenester med hovudfokus på seismikk. Etter tilsynets varsel om mogleg inngrep og grundig analyse, konkluderte tilsynet med at samanslåinga ikkje vil hindre effektiv konkurranse i marknaden. Saka blei derfor lagt ned i april 2024 før 70-dagars varsel.

Norva24 Vest og Vitek Miljø

I september 2024 la Konkurransetilsynet ned forbod mot Norva24 Vest sitt oppkjøp av Vitek Miljø. I august varsla tilsynet at inngrep kunne bli aktuelt i tråd med 70-dagars fristen. Vedtaket vert fatta etter ei vurdering av at oppkjøpet ville svekkje konkurransen i marknaden for tømme- og spyletenester i tidlegare Hordaland fylke. Føretaka er dei to største aktørane innan desse tenestene i regionen og konsentrasjonen i marknaden ville ha auka betydeleg dersom dei fekk gjennomført oppkjøpet Norva24 Vest og Vitek Miljø er kvarandre sine næraste konkurrentar, og med oppkjøpet ville konkurransepresset mellom forsvunne. Det kunne ha ført til høgare prisar og dårlegare kvalitet på tømme- og spyletenester for både private, offentlege og bedriftskundar i området.

I januar 2025 stadfesta Konkurranseklagenemnda vedtaket om forby Norva24 Vest sitt oppkjøp av Vitek Miljø.

Saferoad Holding og Ze Bra Holding

I november 2024 informerte Saferoad Konkurransetilsynet om at dei trekkjer meldinga om oppkjøpet av Ze Bra Holding. Begge aktørane opererer innan marknaden for vegmerking. Oppkjøpet vart meldt i oktober, og Konkurransetilsynet sendte 25-dagers varsel om at tilsynet vurderte å stanse føretakssamanslutninga. Tilsynet meinte at oppkjøpet kunne redusere talet på tilbydarar i marknaden, då Saferoad allereie er den største aktøren. Slik samanslutning kunne ha negativ innverknad på prisar og vilkår for kundane i marknaden. Etter dette valde Saferoad å trekkje meldinga.

Fornying av vedtak – Vipps

I vedtak V2018-18 vedtok Konkurransetilsynet at Vipps AS fekk kjøpe BankAxept AS og BankID Norge AS på vilkår. Vipps vart mellom anna forplikta til å gje tilgang til BankAxept og BankID på ikkje-diskriminerande vilkår til tredjeparts betalingsløysingar. Vedtaket gjaldt i tre år og vart i 2021 fornya med tre nye år.

Konkurransetilsynet har vurdert at føretakssamanslutninga framleis i betydeleg grad vil hindre effektiv konkurranse, og at det er nødvendig å vidareføre vilkåra for dempe dei negative verknadane av føretakssamanslutninga på konkurransen. Vedtaket blei derfor i 2024 forlenga i tre nye år, til og med 27. april 2027.

Avslutning av fusjonssaker der Konkurransetilsynet har sendt varsel om mogleg inngrep 2019-2024

Tal på mottekne meldingar om føretakssamanslåingar 2013-2023 (glidande gjennomsnitt)

Resultatkjede fusjonskontroll

INNSATSFAKTORAR
• Alle marknadsavdelingane arbeider med fusjonskontroll
• Juridisk og økonomisk stab støttar opp i prioriterte saker gjennom informasjonspålegg, marknadsundersøkingar med meir.
• Sakene blir prioriterte ut frå ressursbruk og effekt på marknaden.

AKTIVITETAR
• 151 meldingar om føretakssamanslutningar mottatt.
• Avslutta 147 meldingar om føretakssamanslutningar innan 25 verkedagar
• Påla og følgde opp opplysningsplikt i konsentrerte marknader
• Marknadsovervaking for å vurdere behov for pålegg av meldeplikt eller opplysningsplikt, og pålagt meldeplikt der nødvendig

PRODUKT/TENESTER
• Føretakssamanslutninga mellom Norva24 Vest og Vitek Miljø vart forboden.
• Føretakssamanslutninga mellom TGS og PGS godkjend.
• Fornying av vedtak frå 2018 på vilkår for Vipps.

BRUKAREFFEKTAR
• Føretaka følgjer reglane om meldeplikt og opplysningsplikt.
• Føretaka skrinlegg planar om konkurranseskadelege fusjonar og oppkjøp
• Ordning med forenkla melding og raske avklaringar gjer det enklare for næringslivsaktørane å gjennomføre fusjonar og oppkjøp som ikkje skadar konkurransen.

SAMFUNNSEFFEKTAR
• Auke i konsentrasjon som kunne ført til dårleg konkurranse blir unngått.
• Forbrukarar blir skåna for høgare prisar, mindre utval og mindre innovasjon som følgje av avgrensa konkurranse.

Prioriterte område

Daglegvaremarknaden har i fleire år vore ein prioritet i Konkurransetilsynets arbeid. Marknaden er kjenneteikna av høg konsentrasjon og høge etableringshindringar, noko som normalt ikkje gir gode forhold for sunn konkurranse. Når inflasjon og generell prisstigning kjem på toppen, slik tilfellet har vore dei siste åra, kan det gå hardt utover forbrukarane. Konkurransetilsynet har derfor også i 2024 arbeidd med saker som er viktige for å betre konkurranse i marknaden. Fleire av desse blir omtala nærare nedanfor.

For Konkurransetilsynet er det viktig med god og tett dialog med verksemder, interesseorganisasjonar og andre offentlege myndigheiter tilknytta daglegvaremarknaden. Tilsynet har derfor fleire møter med ulike aktørar gjennom året. Slike møter er nødvendige for at tilsynet skal få oppdatert kunnskap om utviklinga i marknaden, men også for å skape større forståing for dei positive verknadene av konkurranse for både forbrukarane, samfunnet og næringslivet.

Konkurransetilsynet er nøgd med at prisutviklinga på daglegvarer har flata noko ut samanlikna med føregåande år. Medan prisveksten var på nærare 10 prosent i 2023, var han i 2024 på 4 prosent. Tilsynet vil gjere sitt for at denne trenden skal held frem og prioriterer vidare saker og utgreiingar som kan bidra til betre føreseielege vilkår for sunn konkurranse i daglegvaremarknaden.

Etterforskingssaka mot Rema, Coop og NorgesGruppen

I august vedtok tilsynet å påleggje daglegvarekjedene bøter på til saman 4,9 milliardar kroner for brot på konkurranselovas forbod mot konkurranseavgrensande samarbeid. Tilsynet fann at kjedenes samarbeid om å gje tilgang til omfattande prisjegerverksemd i kvarandre sine butikkar har skada konkurransen i daglegvaremarknaden. Saka er nærare omtalt ovanfor under Kartellavdekking og ulovleg samarbeid.

Margin- og lønnsemdstudie

Konkurransetilsynet gjennomførte i 2024 ein marginstudie i daglegvaremarknaden, der lønnsemda og marginane til utvalde daglegvareaktørar og leverandørar vart kartlagde. Marginstudien resulterte i to offentlege delrapportar, og var svar på bestillinga i regjeringas tildelingsbrev for 2023.

I del 1 av marginstudien kartla Konkurransetilsynet lønnsemda i daglegvaremarknaden frå 2017 til 2022. Studien viser at lønnsemda generelt var høgare enn det ein forventar i ein marknad med hard konkurranse og låge etableringshindringar. Tilsynet fann likevel få teikn på at aktørane utnytta koronapandemien eller krigen i Ukraina til å auke lønnsemda.

Del 2 av marginstudien fokuserte på marginar ved bruk av informasjon på produktnivå for perioden 2020 til første halvår 2023. Studien viser at det var stor variasjon i innteninga på ulike daglegvareprodukt. Vidare fann Konkurransetilsynet at daglegvarekjedene hadde lågare margin på sine eigne merkevarer enn på dei kartlagde merkevareprodukta.

Kartlegging av forskjellar i innkjøpsprisar
Konkurransetilsynet har sidan 2017 samla inn detaljert informasjon om kva dei tre største daglegvarekjedene betaler for varer frå ei rekke leverandørar i marknaden. Kartlegginga av prisforskjellar er ein viktig del av Konkurransetilsynet si oppfølging av daglegvaremarknaden, og vil derfor halde fram som ein del av tilsynet sitt arbeid med konkurransen i marknaden. Kartlegginga viser at dei samla prisforskjellane har blitt betydeleg redusert sidan undersøkinga starta.

Negative servituttar

Konkurransetilsynet har tidlegare kartlagt daglegvarekjedenes bruk av såkalla tinglyste negative servituttar, som hindrar etablering av daglegvareverksemd på eigedomar kjedene ikkje sjølv eig. Kartlegginga avdekte at daglegvarekjedene hadde eit ikkje ubetydeleg tal slike servituttar.

Ei forskrift som forbyr bruk av negative servituttar for å avgrense etablering av daglegvareverksemd tredde i kraft 1. januar 2024. Vinteren 2024 gjennomførte tilsynet nye undersøkingar for å kartleggje omfanget av daglegvarekjedenes negative servituttar. Kartlegginga omfatta servituttar stifta av føretak som direkte eller indirekte kontrollerer Coop, Rema, NorgesGruppen og Bunnpris. Undersøkingane avdekte at aktørane hadde negative servituttar som var stifta før forskrifta tredde i kraft, og at det i varierande grad førelåg konkrete planar om å slette desse. Enkelte aktørar hadde likevel allereie starta arbeidet med å slette servituttane då tilsynet tok kontakt.

Undersøkingane til tilsynet tyder også på at fleire av daglegvarekjedenes samarbeidspartnarar har stifta tinglyste negative servituttar til fordel for daglegvarekjedene.

Tilgang til eigna lokale er ei etableringshindring i daglegvaremarknaden, og tilsynet held fram arbeidet med å få betre oversikt over kjedene sin kontroll med eigedomar som kan nyttast til daglegvareverksemd.

Overgang frå målpris til volumprismodell i meierimarknaden

Konkurransetilsynet er oppteke av betydninga sunn konkurranse har for utviklinga i alle ledd i verdikjeda, også i primærleddet. Tilsynet meiner at auka forståing for korleis gode konkurransevilkår også gagnar bøndene, er viktig for å oppretthalde norsk landbruk.

I 2024 vart prismodellen for mjølk endra frå målpris til volumpris. I høyringssvar 15. oktober uttalte tilsynet at ordninga gir for mykje makt til den dominerande marknadsaktøren, noko som kan føre til høgare priser og dårlegare utval av meieriprodukt over tid. Tilsynet oppmoda derfor til innføring av kontrollmekanismar som sikrar forbrukarane og sunn konkurranse

Landbruksdirektoratet har no starta arbeidet med å utreie korleis konkurransenøytralitet skal sikrast under den nye prismodellen. Konkurransetilsynet deltek i dette arbeidet.

Regulering av innkjøpsprisar

Like før nyttår 2023 fremja Nærings- og fiskeridepartementet nytt forslag om regulering av innkjøpsprisar i daglegvaremarknaden. Forslaget var basert på innspel som kom frå førre høyringsrunde i 2022.

Konkurransetilsynet fann fleire utfordringar ved forslaget, mellom anna at forskrifta ikkje var egna til å løyse eventuelle problem knytt til etablering og ekspansjon for små aktørar, og at den også reint rettsleg ville vere vanskeleg å handheve.

Konkurransetilsynet uttalte i høyringssvaret at det deler departementet sitt ønske om lågare etableringshindringar i daglegvaremarknaden, men at andre verkemiddel enn forskrift er nødvendig for å få dette til. Tilsynet trekte særskilt fram justeringar i importvernet og betre tilgang til lokalar. Det fann også at innføring av eit marknadsetterforskingsverktøy ville vere betre eigna til å adressere dei utfordringane forskrifta er meint å løyse.

Daglegvarekonferanse

I august 2024 invitere Konkurransetilsynet til ein konferanse om konkurransesituasjonen i den norske daglegvaremarknaden. Konferansen fann sted i Oslo, på Deichman-biblioteket.

Medieoppslag om daglegvaremarknaden handlar ofte om dei store, etablerte aktørane. Konkurransetilsynet er opptatt av at offentlegheita også skal bli kjent med dei som prøver å utfordre desse. Dersom dei ikkje blir synlege, veit ikkje forbrukar om at det faktisk finst alternativ til dei store og kjedene. Konferansen hadde derfor særleg fokus på mindre aktørar i detaljist- og leverandørleddet i daglegvaremarknaden.

Tilsynet inviterte også svenske konkurransemyndigheiter til ein samtale om forskjellar og likskapar mellom den norske og svenske daglegvaremarknaden. Samtalen var basert på ei nyleg kartlegging av konkurranseforholda i den svenske daglegvaremarknaden, som avdekte at Sverige har mange av dei same utfordringane som i Noreg.

Daglegvarerapport

I januar 2024 publiserte Konkurransetilsynet daglegvarerapporten for 2023. I rapporten skildrar tilsynet utviklinga i marknaden det siste året, samt tilsynet sitt arbeid med marknaden.

Det ble mellom anna presentert resultata frå ein grundig kartlegging av den lokale konkurransen i daglegvaremarknaden. Tilsynet fann at delar av kjedene si omsetning er heilt skjerma for lokal konkurranse, og vidare at det finst fleire lokale marknader med særleg høg konsentrasjon.

Resultatkjede for Konkurransetilsynet sitt arbeid i daglegvaremarknaden

INNSATSFAKTORAR
• Ressursar frå marknadsavdeling for mat, handel og helse og andre einingar i tilsynet.
• Prioritering av ressursar til å styrkje daglegvaremarknaden

AKTIVITETAR
• Generell marknadsovervaking.
• Kartla negative servituttar knytt til daglegvarekjedene sine eigedommar per 1. januar 2024.
Kartlegging av innkjøpsprisar i daglegvaremarknaden.
• Daglegvarekonferanse
• Undersøking av lokal konkurranse på butikknivå.
• Vurderingar av fusjonsmeldingar og kontroll av om opplysnings- og meldeplikt etterlevast.
• Møter med ulike aktørar i marknaden.
• Deltaking på relevante kurs og konferansar
• Jamlege møter med mellom anna Daglegvaretilsynet, Forbrukerrådet og Landbruksdirektoratet.

PRODUKT/TENESTER
• Etterforskinga mot daglegvareaktørane er avslutta, og et gebyr på 4,9 milliardar kroner er pålagt.
• Studie av marginar og lønnsemd del 1 og del 2.
• Høyringssvar.
• Daglegvarerapport for 2023.
• Kronikkar.
• Fornya opplysningsplikt for daglegvarebutikkar.

BRUKAREFFEKTAR
• Hjelper aktørar i daglegvaremarknaden å følgje konkurranselova.
• Marknadsovervaking disiplinerer aktørane i marknaden.
• Meir opplyste forbrukarar.

SAMFUNNSEFFEKTAR
• Betre konkurranse i daglegvaremarknaden gir lågare prisar, meir innovasjon og betre utval for forbrukarane.

Konkurransetilsynet har stort fokus på konkurransen i digitale marknader og særleg på den aukande bruken av prisalgoritmar og korleis dette påverkar konkurransen. For å styrkje arbeidet med utfordringar knytt til digitale marknader og aktørar sin bruk av digitale verktøy som kan skade konkurransen, har tilsynet satt i gang fleire interne prosjekt. Desse prosjekta skal auke kompetansen og gjere tilsynet betre rusta til å avdekke konkurranseproblem i den digitale økonomien.

Maskinlæringsplattforma

Sidan 2023 har Konkurransetilsynet satsa på bruk av maskinlæringsplattforma. Plattforma gjer det mogleg å oppbevare og behandle sensitiv data på ein trygg måte, samtidig som den er skalerbar og kostnadseffektiv. Den gir også tilgang til eit breitt utval av modellar bygd på kunstig intelligens (KI). Dette gjer at vi kan fokusere på bruken av KI utan å bekymre oss for underliggande teknologi og infrastruktur.

Plattforma opnar nye moglegheiter for behandling av både kvantitative og kvalitative analysar ar marknadsdata frå utvalde interne og eksterne kjelder ved hjelp av maskinlæring og kunstig intelligens. Til dømes kan plattforma gjere det mogleg å simulere samspel mellom fleire aktørar i komplekse system og analysere korleis prisalgoritmar fungerer i praksis. Slike analysar gir oss betre innsikt i marknadskrefter og potensielle skadeverknader av konkurransehemmande åtferd.

For å styrkje tilsynets analyseevne samarbeider vi med aktørar som bidreg til å forbetre og utvide vår portefølje av analysar, samstundes som kvaliteten og hastigheita på analysane aukar. Vi samarbeider og tett med andre offentlege etatar, som Direktoratet for forvaltning og økonomistyring (DFØ) og Brønnøysundregistret, om utveksling av data for å betre forstå ulike marknader og avdekkje potensielle kartell. I tillegg har vi eit nært samarbeid med andre lands konkurransestyresmakter der vi utvekslar og utviklar metodar for kartellavdekking.

I løpet av 2024 har vi teke ytterlegare steg i å bygge ei moderne digital verktøykasse for framtida. Den nyoppretta eininga for data og analyse har kome godt i gang med å utvikle nye verktøy i plattforma, til dømes verktøy for transkribering av tale til tekst, samt verktøy for oppsummering og indeksering av dokument. Vidare integrerer vi stadig nye datakjelder og vidareutviklar funksjonaliteten i plattforma, noko som styrkjer vår kapasitet i den digitale økonomien og gjer tilsynsarbeidet meir effektiv.

Kunstig intelligens

Kunstig intelligens og konkurranse

Kunstig intelligens (KI) gir store moglegheiter innanfor innovasjon og effektivisering, men kan også påverke konkurransen. KI kan brukast til å analysere store datamengder og utvikle avanserte prisalgoritmar, noko som skapar nye utfordringar. For eksempel kan lynrask deling av marknadssensitiv informasjon og bruk av sjølvlærande prisalgoritmar potensielt føre til priskoordinering utan menneskeleg innblanding. Store aktørar med tilgang til omfattande datamengder kan oppnå konkurransefordelar som gjer det vanskelegare for mindre aktørar å etablere seg.

EU har utarbeidd ei KI-forordning som legg større ansvar på bedrifter. Dei må kunne dokumentere teknologi som prisalgoritmar ikkje fører til skadeleg koordinering av prisar, og at bruken av KI ikkje gir utilsikta negative konsekvensar for forbrukarane. I Noreg har Konkurransetilsynet peika på behovet for meir fleksibilitet i konkurransekontrollen for å avdekkje nye former for konkurranseavgrensingar. For å sikre at KI vert brukt til å styrkje innovasjon og rettferdig konkurranse, følgjer vi utviklinga i fagfeltet tett og samarbeider med internasjonale aktørar.

Kunstig intelligens i vårt arbeid

I 2024 har vi arbeidd med å utforske korleis KI kan effektivisere saksbehandlinga og styrkje analysekapasiteten vårt. Vi har identifisert fleire bruksområde som vil effektivisere vår saksbehandling og utvikla konkrete verktøy som vil bli gjort tilgjengeleg for alle medarbeidarar i 2025. Det er viktig for oss at alle våre KI-tiltak bidreg direkte til ei meir effektiv handheving av konkurranselova. Vi følgjer med på utviklinga i KI-marknaden, slik som tilgangen til treningsdata, maskinvare og andre ressursar som er nødvendige for å utvikle KI-verktøy.

Nokre av KI-baserte verktøy har vi allereie tekne i bruk:

  • Automatisk omsetjing av dokument
    Ved bruk av Azure AI Translator kan vi no omsetje dokument i opptil 150 språk, samtidig som formateringa blir bevart. Dette gjer det enklare for oss å dele informasjon på andre språk og auke forståing av framandspråklege dokumenter.
  • Avskrift av lyd- og videoopptak
    Vi har tatt i bruk ei verktøy som transkriberer opptak til tekst. Dette gjer opptak søkbare, forenklar dokumentasjon av møter og referat, og gjer det enklare å dele informasjonen meir effektivt.
  • Bruk av store språkmodellar (LLMs)
    Vi har brukt LLMs i fleire prosjekt, blant anna til oppsummering av dokument, utvinning av nøkkelinformasjon og klassifisering av nyheitsartiklar og dokument. Dette inkluderer til dømes å identifisere om ein nyheitsartikkel handlar om føretakssamanslutningar eller nemner eit selskap vi følgjer med på.
  • Analyse av konkurranseforhold
    Vi har brukt maskinlæring til å analysere datasett med både numeriske og ikkje-numeriske variablar for å forstå dei underliggjande kreftene som driv prisendringar i eit marknad. Vi har og gjennomført numeriske analysar, som i oppdaging av kartell i anbodsdata og marknadsdelanalysar.

For å sikre at investeringane i KI gir mest mogleg verdi, legg vi vekt på at løysingane skal vere gjenbrukbare, breitt forankra i organisasjonen og tilpasse våre medarbeidarane sine behov.

Marknadsetterforskingsverktøyet

Auka digitalisering i økonomien gjer marknadene stadig meir komplekse. Våren 2023 la Nærings- og fiskeridepartementet fram eit forslag om lovendingar, med bakgrunn i blant anna bekymringar knytt til auka bruk av kunstig intelligens og prisalgoritmar. Desse teknologiane kan leggje til rette for stillteiande samarbeid som kan svekkje konkurransen og påverke forbrukarane negativt.

Stortinget har vedteke endringar i konkurranselova som innfører marknadsetterforsking som eit nytt verktøy for handheving av konkurranselova. Desse endringane trer i kraft frå 1. juli 2025. Formålet med lovendringa er å gi Konkurransetilsynet moglegheit til å fatte vedtak om avhjelpande tiltak dersom tilsynet avdekkjer forhold som vesentleg avgrensar konkurransen, eller som kan føre til dette.

Før Konkurransetilsynet startar ei etterforsking, må det gjennomførast ei open høyring for å sikre dialog med alle ramma aktørar. Dette er avgjerande for å sikre at tiltaka som vert sette i verk er målretta, effektive og forholdsmessige, og at dei ikkje går lenger enn nødvendig.

Anna arbeid

Konkurransetilsynet skal vere ein aktiv pådrivar for velfungerande konkurranse. Gjennom synlegheit og rettleiing arbeider tilsynet for å auke kunnskapen om tilsynet sitt arbeid og styrkje næringslivet sitt kjennskap til konkurransereglane. Auka merksemd om konkurranse som eit verkemiddel for effektiv ressursbruk kan bidra til å utvikle betre løysingar, inkludert endringar i reguleringar som legg til rette for meir konkurranse.

Konkurransetilsynet har eit breitt spekter av pådrivar- og rettleiingsaktiviteter, noko som kjem fram i tabellen nedanfor. Tiltaka våre spenner frå høyringsfråsegn og påpeikingar ved konkurransehemmande reguleringar til informasjonskampanjar, medieoppslag, konferansar, webinar, innlegg i sosiale medium og skulebesøk. Målet vårt er å nå viktige målgrupper gjennom aktivt informasjonsarbeid på ulike plattformer for å auke kunnskapen om konkurranselova og fremje forståing av kva som skal til for å oppnå sunn konkurranse til det beste for samfunnet, næringsliv og forbrukarane.

I 2024 vart det gjennomført ei brei tips-kampanje som inkluderte både ein nasjonal annonsekampanje, postar på sosiale medium og informasjonsmøte med næringsliv i dei største byane i Noreg. Målet var å få inn fleire tips og auke kunnskapen om konkurranselova.

Frå midten av fjoråret var det avgjort at Konkurransetilsynet ikkje lengre vil halde fram på Facebook og X. Det vart avgjort på bakgrunn av fleire årsaker, mellom anna dei to plattforma sine brot på personvern, og videresal av brukarar sine personopplysningar til tredjepartar. Tilsynet vil halde fram på Linkedin, ein kanal der tilsynet stadig får fleire følgjarar.

Rettleiing

Konkurransetilsynet tilbyr rettleiing til ulike aktørar gjennom ulike kanalar. Det finst omfattande informasjon om konkurranselova på heimesidene våre og vi svarar på generelle spørsmål via telefon, e-post og i fysiske møter. I tillegg blir det held foredrag og innlegg på kurs og konferansar i samarbeid med bransjeorganisasjonar og andre relevante aktørar. I januar vidareførte tilsynet opplysningsplikta til aktørar i konsentrerte marknader. Det er også laga videoar for enkel innføring i konkurransereglane.

Tilsynet gir generell rettleiing, informasjon om reglar og tidlegare praksis, men har ikkje høve gi godkjenning på førehand i einskilde saker. Tilsynet sine vedtak inneheld omfattande juridiske og økonomiske vurderingar som kan overførast til andre saker og problemstillingar. Ekspertane våre skildrar aktuelle tema innanfor konkurranselovgjeving gjennom Konkurransepodden og ulike kronikkar om emne som effektiv konkurranse, prisregulering og fusjonskontroll. Den årlege juskonferansen i juni gir også verdifull rettleiing og innsikt i norsk og EU/EØS-lovgjeving.

Konkurransehemmande reguleringar

I 2021 lanserte Konkurransetilsynet ein tipsfunksjon der næringsdrivande og andre kan melde frå om reguleringar som blir oppfatta som konkurransehemmande. I 2024 fekk vi 33 tips som vart vurderte for oppfølging. Desse tipsa bidreg til at vi kan ivareta oppgåvene våre etter konkurranselova § 9e, som inneber å påpeike konkurranseregulerande verknader av offentlege tiltak.

Resultatkjede for Konkurransetilsynet sitt arbeid med å vere pådrivar for konkurranse

INNSATSFAKTORAR

• Ressursar frå kommunikasjonsstab, konkurransedirektøren sin stab og marknadsavdelingane
• Medieovervaking

AKTIVITETAR 2024
Sidevisningar på konkurransetilsynet.no 432 226
Nytt nynorsk innhald på kt.no 24,5%
Miljøklassifisering konkurranstilsynet.no B (Carbon rating)
Total abonnentar på nyheitsvarsel frå Konkurransetilsynet 905
Følgjarar på sosiale medium LinkedIn: 3916
Nynorsk innhald på sosiale medium 34,1%
Tal webinar 4
Føredrag 38
Innsynskrav 881 (inkluderer ikkje partsinnsyn)
Tal podkastepisodar 1
Total nedlasting av podkast 11 400 totalt
Tal kronikkar 11
Tal konferansar 2
Tal høyringsfråsegn 12
Tal rapportar 3
Tal påpeikingar 0
Tal skulebesøk 353 elever fordelt på 13 skuleklassar
Tal tips konkurransehemmande reguleringar 33
Tal medieoppslag 4652
Klart språk-kurs internt 2

 

BRUKAREFFEKTAR
• Auka kjennskap til Konkurransetilsynet sitt arbeid og konkurranselova
• Fleire føretaksleiarar tek aktive grep for å sikre at verksemda følgjer konkurransereglane
• Fjerning av konkurransehemmande reguleringar for å fremje verksam konkurranse

SAMFUNNSEFFEKTAR
• Velfungerande marknader som gir lågare priser, betre utval og kvalitet, og meir innovasjon

2024 har Konkurransetilsynet vore aktivt i fleire viktige internasjonale forum. Målet er å ivareta oppgåvene våre for departementet, oppfylle lovpålagde plikter, bidra med erfaringane våre og dra nytte av internasjonal kunnskap for å ivareta oppgåvene våre på ein endå betre måte.

Vi har mellom anna delteke i det Europeiske Konkurransenettverket (ECN) og OECDs Konkurransekomité. Vi samarbeider òg med nordiske og internasjonale partnarar gjennom det nordiske samarbeidet og International Competition Network (ICN). Gjennom desse nettverka deler vi kunnskap og lærer av andre, noko som styrkjer evna vår til å fremje velfungerande konkurranse.

Høgdepunkt frå det internasjonale arbeidet i 2024:

  • EØS-arbeid: Gjennom EØS-avtalen har vi ansvar for å handheve konkurransereglane. Vi deltok i både formelle og uformelle møte knytt til EØS, noko som sikrar at vi er oppdaterte og bidreg aktivt i viktige diskusjonar.
  • ECN-nettverket: ECN består av 10 arbeidsgrupper, 11 sektorvise undergrupper, og eigne grupper for Digital Markets Act (DMA) og internasjonalt samarbeid. Vidare er det 2 årlege plenarmøte og møte mellom generaldirektørane i nettverket. Det vart arrangert 36 møter i nettverket, nokre av dei digitale. Vi held NFD informert om regelverkssaker som det arbeidast med i nettverket.
  • Digital Markets Act (DMA): DMA er ein EU-forordning som skal regulere store digitale plattformar for å fremje opne og rettferdige marknader, samt verne forbrukarar og mindre aktørar i digitale marknadar. Arbeidet med utforminga av DMA har vore særleg viktig å følgje og rapportere på. Vi har delteke i møte knytt til DMA i ECN- og EFTA-samanheng, og bidrege i ei interdepartemental arbeidsgruppe.
  • EFTA-Samarbeid: Vi har hatt tett kontakt med EFTA sitt overvakingsorgan ESA. I oktober besøkte ein ESA-delegasjon tilsynet i Bergen for å arrangere eit internseminar om regelverket knytt til EØS-avtalen sine konkurransereglar. Under besøket var det og halde møte mellom leiinga i dei to tilsynsorgana for å diskutere aktuelle problemstillingar. I tillegg samarbeider tilsynet med dei andre EFTA-landa gjennom EFTA Competition Network.
  • Bilaterale møte: God dialog med andre konkurransestyresmakter i Europa er viktig for å handheve konkurransereglane effektivt. Vi hadde bilaterale møte med konkurransestyresmaktene i Austerrike, Tyskland og Frankrike.
  • OECDs Konkurransekomite: Konkurransetilsynet representerer Noreg i OECD sin Konkurransekomité. Komiteen har møte som varer i ein uke to gongar i året. I tillegg til å bidra til årsrapporten for 2023, bidrog vi med to skriftlege innlegg:
    Eit skriftleg bidrag til sesjonen om “Konkurranse i forsyningskjeden for mat” og
    eit til sesjonen på “Interaksjon mellom konkurranse og demokrati”.
    Konkurransedirektøren deltok og aktivt i Byrået, det styrande organet for Konkurransekomiteen.
  • Nordisk samarbeid: Vi deltek i fleire nettverksgrupper for erfaringsutveksling og praktisk handhevingssamarbeid, i tillegg til det årlege møtet mellom konkurransestyresmaktene og møte mellom konkurransedirektørane.
    • I januar blei den nordiske rapporten “Competition and Labour markets” publisert. Rapporten rettar søkelyset mot konkurransehemmande avtalar som påverkar arbeidsmarknaden.
    • I mai møttes kommunikasjonsstabane frå dei nordiske konkurransestyresmakt hos det danske konkurransetilsynet i København.
    • Det vart halde møte i ein nordisk nettverksgruppe i Helsinki, der deltakarane utveksla erfaringar om innsamling og analyse av data frå offentlege innkjøp.
    • Årlege nordiske møte: Det årlege møtet mellom dei nordiske konkurransestyresmaktene vart halde i Turku, Finland, der Konkurransetilsynet organiserte ein sesjon om på inngrepsterskelen i fusjonskontrollen. Vi deltok òg på dei andre temamøta om marknadene for skytenestar, lading av elbilar og marknadsetterforsking. Dei nordiske konkurransedirektørane hatt jamleg kontakt gjennom året, mellom anna ved det årlege generaldirektørmøtet, som vart arrangert på Svalbard.
  • ICN-samarbeidet: Konkurransetilsynet har vore med å leie ICN Merger Working Group og har i den samanhengen vore med på å arrangere eit webinar om vurdering av effektivitetsgevinstar i fusjonskontrollen. Dette var ein del av ei webinar-rekke om “Investigative Techniques in Merger Control”.

Berekraftig utvikling og konkurransepolitikk står sentralt i Konkurransetilsynet sitt arbeid. Konkurransereglane må brukast og handhevast på ein måte som fremjar berekraft. Det betyr at Konkurransetilsynet aktivt handhevar brot på konkurranselova som hemmar berekraft.

Vi ser på konkurranse som eit kraftfullt verktøy for innovasjon og omstilling, og ein katalysator for ein berekraftig utvikling i norsk økonomi. Samtidig er vi opptekne av at konkurransereglane ikkje skal hindre samarbeid som bidreg positivt til berekraftig utvikling.

Høyringssvar i 2024

  • NOU 2023:26
    Konkurransetilsynet støttar forslaget om å forenkle og modernisere regelverket for offentlege anskaffingar, men meiner at omsynet til konkurranse må vektleggast tydelegare. Grøne offentlege anskaffingar kan redusere konkurranse på kort sikt, men på lengre sikt stimulere innovasjon og konkurranse om berekraftige løysingar. Det er behov for eit regelverk som gir innkjøparane tilstrekkeleg fleksibilitet til å utforme anbod på ein god måte, i samsvar med målet om effektiv og berekraftig bruk av samfunnets ressursar. Samtidig må konkurransen ikkje avgrensast på ein måte som i realiteten hindrar både effektivitet og berekraft.
  • Tilgjengeleggjering av ladeprisar
    God konkurranse i lademarknaden gir elbilistar lågare priser og høgare kvalitet. Konkurransetilsynet er positiv til EU-krav om sanntids trafikkinformasjon som gjer det enklare for bilistar å velje det beste ladetilbodet. Samstundes er det viktig å utforme slike tenester slik at dei kjem kundane til gode utan å avgrense konkurransen.
  • Batteriforordninga og berekraft
    EU si batteriforordning er viktig for å sikre berekraft, nå gjenvinnings- og innsamlingsmål, og støtte overgangen til ein sirkulær økonomi, noko som er ein er ein viktig del av EUs strategi. Konkurransetilsynet er positiv til at forordninga gjennomførast i norsk rett, men peiker på at det ikkje må bidra til deling av meir informasjon enn det som er strengt naudsynt for at produsentansvarsselskapa kan ivareta forpliktingane sine.

Oppfølging og deltaking i berekraftsdebattar

Konkurransetilsynet følgjer utviklinga i andre land og har i 2024 deltatt på møter om berekraft i regi av ICN og ECN.

Marknaden for lading av elbilar er viktig for å redusere utslepp frå biltransport. I 2024 fornya vi opplysningsplikta for dei fem største aktørane innan hurtiglading og lynlading i Noreg.

Vi har og bidratt til diskusjonar om konkurranse og berekraft, mellom anna ved å delta på eit frukostseminar om konkurranserett og berekraft i regi av Arntsen de Besche. Her diskuterte vi korleis konkurranselova fremjar, eller kan fremje, ein berekraftig utvikling. I tillegg har vi deltatt i podkasten Bærekraftseventyret, om kvifor konkurranse er viktig for berekraft.

Konkurransefagleg forsking er viktig for arbeidet til Konkurransetilsynet. Sidan 2014 har tilsynet finansiert forsking innan konkurranseøkonomi og konkurranserett. Dette har styrkt norske forskingsmiljø på desse fagfelta og gitt nyttig kunnskap for Konkurransetilsynet. Dei seinare åra har finansieringa skjedd gjennom øyremerka midlar over budsjettet til Konkurransetilsynet.

I 2024 omfatta dei pågåande forskingsprosjekta tema som konkurransen i daglegvaremarknaden, kartellpolitikk, mediemarknaden og digitale plattformar. Fleire forskingsprosjekt vart avslutta med gode resultat. Ei detaljert oversikt over forskingsprosjekta i 2024 er tilgjengeleg i vedlegg 1, medan ei fullstendig oversikt over alle forskingsprosjekt og artiklar finst på nettsida vår.

I 2024 vart det tildelt midlar på om lag 2,4 millionar kroner til tre prosjekt. Desse prosjekta skal mellom anna studere berekraft og konkurransen i digitale plattformmarknader.

For 2025 er Konkurransetilsynet tildelt 2,2 millionar kroner i forskingstilskot. Ved å støtte nye prosjekt ønskjer vi å fremje kunnskapsdeling mellom tilsynet og akademia. Vidare satsing på forsking og utgreiing bidreg til å styrkje kunnskapsgrunnlaget for konkurransepolitikken og sikre effektiv handheving av konkurranselova.

Nye forskingsprosjekt fremjar kunnskapsdeling mellom tilsynet og akademia. Vidare satsing på forsking og utgreiing styrkjer kunnskapsgrunnlaget for konkurransepolitikken og sikrar effektiv handheving av konkurranselova.

Tildeling av prisar for beste masteroppgåver

Kvart år sidan 2004 har Konkurransetilsynet delt ut pris for beste masteroppgåve innan konkurranseøkonomi og konkurranserett. Prisen er på 25 000 kroner for kvart fagområde. Formålet med prisen er å auke studentane sitt interesse for konkurransepolitikk og styrkje nettverket mellom akademia og tilsynet.

I 2024 vart Hien Nguyen Thi Thu og Kenneth Hartmann frå Noregs Handelshøgskule (NHH) tildelt prisen innan konkurranseøkonomi for oppgåva “Restrictive covenants in the Norwegian grocery market: an empirical study”.
Savvas Julian Johnstad Gabor frå Universitet i Oslo (UiO) vart tildelt prisen innan konkurranserett for oppgåva “Agreements That Mitigate Climate Change and the Prohibition of Anticompetitive Agreements in Article 101 TFEU”

Her kan du lese om tidlegare prisvinnarar og oppgåver.